سیڈابورڈ کا 58 واں اجلاس، خاتون افسر سے متعلق تحقیقاتی رپورٹ میں کرپشن ثابت ہونے پرمقدمہ درج
حیدرآباد(گردوپیش
سندھ اریگیشن اینڈ ڈرینج اتھارٹی (سیڈا) بورڈ کا 58 واں اجلاس، خاتون افسر سے متعلق تحقیقاتی رپورٹ میں کرپشن ثابت، بورڈ نے ان کے خلاف ایف آئی آر درج کرکے ہراساں کرنے کے جھوٹے الزامات لگانے پر متعلقہ حکام سے قانونی کارروائی کا مطالبہ کردیا۔ تفصیلات کے مطابق سیڈا بورڈ کا 58 واں اجلاس چیئرمین سیڈا قبول محمد کھٹیان کی صدارت میں سیڈا سیکریٹریٹ مین منعقد ہوا جس میں سیڈا کے منیجنگ ڈائریکٹر پریتم داس، محکمہ آبپاشی کے نمائندے چیف انجینئر ساجد حسین بھٹو، سیکرٹری پلاننگ اینڈ ڈویلپمنٹ زبیر چنا اور نذیر عیسانی، خیرپور یونیورسٹی آف ٹیکنالوجی کے وائس چانسلر رسول بخش مہر، پراجیکٹ ڈائریکٹر سوات میر غلام علی ٹالپر، محکمہ زراعت کے نمائندے اور دیگر ممبران نے شرکت کی۔ اجلاس میں سیڈا کے چیئرمین قبول محمد کھٹیان نے ایم ڈی سیڈا کے خلاف الزامات کی تحقیقاتی رپورٹ ممبران کے سامنے پیش کی، اس دوران سیڈا کے منیجنگ ڈائریکٹر پریتم داس اور جنرل منیجر فنانس نعیم احمد میمن رضاکارانہ طور پر اجلاس سے چلے گئے تا کہ بغیر کسی دباؤ کے اور شفاف طریقے سے رپورٹ پر بحث کی جا سکے۔ رپورٹ پیش کرتے ہوئے چیئرمین سیڈا نے بورڈ ممبران کو بتایا کہ ملزمہ شکیلہ لغاری کے کیس کی تحقیقات کے لیے بنائی گئی اعلیٰ سطحی کمیٹی نے سماعت کی، جس میں شکیلہ لغاری پیش ہوئیں اور اپنا بیان ریکارڈ کرایا۔ جس کا ریکارڈ بھی لیا گیا ہے۔ انہوں نے کہا کہ تحقیقات کے دوران معلوم ہوا کہ شکیلہ لغاری کی جانب سے لگائے گئے الزامات میں کوئی صداقت نہیں اور وہ ایسا کوئی ثبوت پیش نہیں کر سکیں۔ جبکہ الزامات بھی 2 سال پرانے ہیں اور خاتون افسر کی جانب سے بتائے گئے گواہوں کے مطابق یہ الزامات جھوٹے اور بے بنیاد ہیں۔ اس کے بعد سیڈا بورڈ ممبران نے متفقہ طور پر فیصلہ کیا کہ صوبائی محتسب کو رپورٹ بھیجی جائے کہ خاتون افسر نے جھوٹے الزامات لگائے ہیں، جس پر اس کے خلاف قانونی کارروائی کی جائے۔ اجلاس میں جنرل منیجر ٹرانزیشن غلام مصطفیٰ نے خاتون افسر کی طرف سے اکرم واہ کے متاثرین کو معاوضے کی رقم کی تقسیم میں ہونے والی کرپشن پر رپورٹ بھی پیش کی۔ جس میں جنرل منیجر نے بورڈ کو بتایا کہ معاوضے کی فہرست میں شکیلا لغاری نے 12 فرضی نام داخل کیے اور ان کے ذریعے 41 ملین روپے کی کرپشن کا انکشاف ہوا۔ جس کا شکیلا لغاری نے اعتراف کرتے ہوئے 8 ملین روپے واپس کئے اور 20 ملین روپے کانٹریکٹی ملازم معاذ آفندی کے پاس ہونے کا انکشاف کیا۔ جس کو مختلف اوقات میں پیش ہونے اور صفائی پیش کرنے کے لیے بھی کہا گیا لیکن وہ پیش نہیں ہوئے جس کی وجہ سے قانونی کارروائی مکمل کرنے کے بعد معاذ کو ملازمت سے برطرف کر دیا گیا ہے۔ اس سے قبل سیڈا کے منیجنگ ڈائریکٹر پریتم داس نے اکرم واہ کے متاثرین کو معاوضے کے حوالے سے بورڈ کو آگاہ کرتے ہوئے کہا کہ سیڈا اکرم واہ کی بحالی کے کام پر کام کر رہی ہے۔ ورلڈ بینک کی پالیسی کے مطابق اکرم واہ پر فنڈز کے اجراء سے قبل حدد خلیان ہٹانے کی مہم میں متاثرہ خاندانوں کا سروے کرنے کے لیے کنسلٹنٹس کا تقرر کیا گیا تھا، سروے کے بعد متاثرین کی فہرست تیار کی گئی جسے ایگزیکٹو انجینئر اکرم کو ای میل کے ذریعے بھجوا دیا گیا۔ جس نے ای ڈی پی اسکیم بنا کر سندھ حکومت کو بھیجی۔ بجٹ کی منظوری کے بعد معاوضہ دینے کا عمل شروع کر دیا گیا۔ انہوں نے کہا کہ مئی 2023 مین ریسرچ اینڈ ڈویلپمنٹ کے جنرل منیجر نے نشاندہی کی کہ خاتون افسر نے کنسلٹنٹ کی طرف سے بنائی گئی فہرست میں 12 نام شامل کر کے بدعنوانی کی ہے۔ جس پر تحقیقاتی کمیٹی بنائی گئی جس میں اس بات کی تصدیق ہوئی کہ اس رقم میں کرپشن ہوئی ہے۔ سیڈا بورڈ ممبران نے متفقہ طور پر فیصلہ کیا کہ شکیلہ لغاری اور معاذ آفندی کے خلاف کرپشن کے الزامات ثابت ہونے پر دونوں ملازمین کے خلاف 24 گھنٹے کے اندر ایف آئی آر درج کرائی جائے اور ان سے سرکاری رقم وصول کی جائے اور انہیں برطرف کیا جائے۔ جبکہ سیڈا کے جنرل منیجر فنانس کے خلاف الزامات کی رپورٹ بھی بورڈ کے سامنے پیش کر دی گئی۔ رپورٹ کے مطابق شکیلہ لغاری نے ڈیڑھ سال پرانے موبائل میسجز کو جواز بنا کر ہراساں کرنے کے الزامات لگائے جب کہ اس معاملے کی تفصیلی تحقیقات کے بعد رپورٹ اس نتیجے پر پہنچی کہ الزامات میں کوئی صداقت نہیں اور شکیلہ لغاری نے کچھ مخصوص مفادات حاصل کرنے کے لئے ڈرامہ رچایا۔ ان کے الزامات میں کوئی صداقت نہیں اور وہ اس حوالے سے کوئی ثبوت فراہم نہیں کر سکی۔ بورڈ میٹنگ میں تینوں ایریا واٹر بورڈز کے ڈائریکٹرز کو آبیانے کی وصولی کو بہتر بنانے کی ہدایات جاری کی گئیں اور ای آبیانہ اسکیم پر تیزی سے عملدرآمد پر زور دیا گیا۔
